თამარ მელიქიშვილის შემოქმედების მხატვრულ-სტილისტური თავისებურებები (თანამედროვე ქართული მხატვრობის რამდენიმე ძირითადი ტენდენცია)

აბსტრაქტი

წინამდებარე ნაშრომში ჩვენ განვიხილეთ XX საუკუნის 1990-2000-იან წლებში და დღესდღეობითაც აქტიურად მოღვაწე ქართველი მხატვრის - თამარ მელიქიშვილის რელიგიურ თემატიკაზე და ასევე სხვადასხვა ჟანრში შესრულებული ნამუშევრები და ამ პერიოდში მოღვაწე მხატვრებთან შედარებისას გამოვკვეთეთ თანამედროვე ქართული ხელოვნების ძირითადი ტენდენციები. თ.მელიქიშვილის ფერწერული ნამუშევრები გარკვეული ქრონოლოგიური თვალსაზრისით დავაჯგუფეთ და მათში ერთგვარი ევოლუციაც დავინახეთ; გამოვყავით გარკვეული ეტაპები და აღმოვაჩინეთ, რომ ნაწარმოებები დროის მიხედვით გარკვეულ ცვლილებას განიცდიან. მათში მკაფიოდ იკითხება ფერწერულ თუ სტილისტურ ძიებათა პროცესი, მაგრამ მიუხედავად ამისა, მხატვრის ხელწერა და მთელი მისი შემოქმედება მკაფიო მხატვრულ-ესთეტური მთლიანობით ხასიათდება.

ნამუშევრების მხატვრულ-სტილისტური ანალიზით გამოიკვეთა, რომ კომპოზიციის გადაწყვეტის ლაკონიურობა და მხატვრული სახის ესთეტიზირება, პირობითი სამეტყველო ენა, ნიშან-სიმბოლოებით სათქმელის გადმოცემა, ფერის განსაკუთრებული დატვირთვა, გრაფიკისა და ფერწერის სინთეზი მისი მხატვრობის სახასიათო ნიშნებია. სურათის კომპოზიციურ წყობაში განსაკუთებული მნიშვნელობა ენიჭება კოლორიტს, ტონალურ გამას, რომელშიც სჭარბობს ლურჯი, მოცისფრო, ლაჟვარდისფერი, მოვარდისფრო ტონები. ნამუშევრებში აშკარად ჩანს, რომ მხატვარი დაოსტატებულია ფერწერაში და ჩამოაყალიბა საკუთარი მხატვრული სისტემა. 1990-2000-იან წლებში მოღვაწე მხატვრების ნამუშევრების განხილვისას იკვეთება ის ტენდენციები, რომლებიც ამ თაობის შემოქმედთა გარკვეული ნაწილისათვის საერთოა და მხატვართა განსხვავებული ხელწერის მიუხედავად, ამ პერიოდის მხატვრობის საერთო სურათს ქმნის.

სრული ტექსტი: PDF, 99 გვერდი. ნაშრომის გახსნა